Deklaratave të kryetares së LSI, Monika Kryemadhi, se me Kodin e ri Zgjedhor opozita do të marrë 100 mandate, kryeministri Rama i është përgjigjur me ironi.
Mbrëmjen e së hënës në emisionin “Opinion” Kryemadhi tha se opozita e PD dhe LSI në zgjedhjet e 25 Prillit, me ndryshimet e fundit zgjedhore përllogarit 100 mandate.
“Ne me PD e kemi kalkuluar strategjinë elektorale, e kemi perfekte. Me strategjinë e re që ne kemi përgatitur, e cila do të shpallet pasi të mos ketë më ndryshime në kodin zgjedhor, kodi i ri LSI-së dhe PD-së i jep 100 mandate. Ndërsa kodi i vjetër na jep 84 deri në 86 mandate” u shpreh Kryemadhi, duke shtuar se Rama nuk e ka pritur që opozita do të firmoste më 5 Qershor.
Në një postim në Instagram, Rama risjell deklaratën e Kryemadhit dhe shtron pyetjen pse opozita është kundër Kodit të ri Zgjedhor?
”Gënjeka Baba Xhikja atëherë”, shkruan më tej Rama duke ironizuar kështu kundërshtinë që presidenti Meta ka shprehur për ndryshimet e reja në Kodin Zgjedhor./Opinion.al
