Kryeministri Edi Rama ka folur nga Gjirokastra dhe për kërkesën e 28 deputetëve të PD në Gjukatën Kushtetuese për shfuqizimin e vendimit të qeverisë për të sekuestruar katet pa leje.
Në fjalën e tij, Rama tha se vendimi i qeverisë është përfundimtar për të mos lejuar më të ndërtohen apartamente e dyqane pa leje nëpër kulla e nëpër pallate.
Ndër të tjera, kreu i qeverisë tha “Imagjinojeni tani se çfarë paraje po mblidhet për të blerë rrëzimin e një vendimi kaq të rëndësishëm”.
“Kur ne filluam rilindjen urbane thonin, fasada, fasada. Çfarë fasade? Si fasada? Rilindja urbane ishte akupunturë, kur je mpirë komplet dhe me ato gjilpërat e asaj terapisë së famshme antike kineze fillon rigjallërimi i trupit. Akupuntura është e njohur në teorinë e zhvillimit urban. Por kujt t’ia thuash këtë? Atyre që akoma sot nuk heqin dorë nga ideja që i kanë bërë një shërbim të madh Shqipërisë duke frymëzuar ndërtimet pa leje? Apo atyre që shkojnë në Gjykatë Kushtetuese, imagjinojeni, është hera e parë, shkojnë në Gjykatë Kushtetuese, imagjino parti politike që do të marrë pushtetin, shkon në Gjykatën Kushtetuese për të rrëzuar vendimin e qeverisë për konfiskimin e ligjshëm dhe marrjen për t’ia dhënë njerëzve dhe shtetit të të gjitha metrave katrorë të ndërtuara pa leje. Si ka mundësi? Këta që më akuzojnë mua, që na akuzojnë ne që mbështesim oligarkët, që i kemi ne, i kam unë kullat e pallateve të cilave do u merret çdo metër katrorë që i kanë bërë pa leje këta çojnë në Gjykatën Kushtetuese për ta rrëzuar. Imagjinojeni tani se çfarë paraje po mblidhet për të blerë rrëzimin e një vendimi kaq të rëndësishëm, kaq domethënës dhe kaq përfundimtar për të mos lejuar më jo të bëjnë apartamente e të bëjnë dyqane pa leje nëpër kulla e nëpër pallate, por mos të bëjnë më asnjë shtesë, as këtu, në shtëpitë karakteristike tradicionale”, u shpreh Rama.
28 deputetë të Partisë Demokratike depozituan më 14 Tetor në Gjykatën Kushtetuese një kërkesë për shfuqizimin si antikushtetues të vendimit të qeverisë për të sekuestruar katet pa leje.
Në draft thuhet se akti normativ është në kundërshtim me Kushtetutën, sepse cenon barazinë e shtetasve përpara ligjit, cenon hierarkinë e akteve normative dhe nuk është autorizuar nga ligji.
Në padi thuhet se nisma është në kundërshtim edhe me Kodin Penal, sepse u jep amnisti penale një kategorie personash, pa një ligj të miratuar me 3/5 e votave në Kuvend dhe se është në kundërshtim me ligjin për planifikimin dhe zhvillimin e territorit.
