Partia Demokratike ka depozituar kërkesë për ngritjen e Komisionit Hetimor për udhëtimet me charter të kryeministrit, Edi Rama.
Kanë qenë 36 Deputetë të Kuvendit të Shqipërisë që depozituan në Kuvend kërkesën për ngritjen e Komisionit Hetimor “Për verifikimin e ligjshmërisë së shpenzimeve të udhëtimeve me avion jashtë shtetit të Kryeministrit në detyrë, nga data 10.09.2013 deri në datë 31.10.2022″.
Në kërkesë theksohet se faktet e publikuara janë tronditëse. ” Kryeministri rezulton të ketë udhëtuar 137 herë jashtë shtetit me avion privat të tipit “charter”, pa llogaritur udhëtimet e tjera me avion të linjave të zakonshme me intervale 3-4 ditore njëri nga tjetri.
Sipas PD, rezulton se edhe gjatë krizës së pandemisë Covid-19, Kryeministri ka kryer rreth 20 udhëtime me avion “charter” dhe se shifra e 137 udhëtimeve është dy herë më shumë se numri i udhëtimeve të ish-Presidenti amerikan Xhorxh W. BUSH, i cili, në dy mandate, kishte kryer 74 fluturime me avionin presidencial amerikan “Air Force One”.
Kujtojmë se opozita ka akuzuar në vazhdimësi kryeministrin Rama për shpërdorim të fondeve dhe parave publike.
