PD kërkon të ndryshojë Kushtetuta sa i përket ligjeve për zgjedhjen e Prokurorit të Përgjithshëm. Grupi parlamentar demokrat që u mblodh mesditën e sotme ka firmosur një dokument ku i kërkon Kuvendit kthimin e ligjshmërisë. Pika e parë e kërkesës argumenton se është shkelur kushtetuta në zgjedhjen e prokurores së përkohshme. Sakaq mësohet se në të njëjtën linjë është edhe LSI-ja.
Amendamenti në fjalë parashikon zgjedhjen e Kryeprokurorit të përkohshëm me 3/5 e votave ne Kuvend dhe Vetting, derisa të ngrihet KLP.
PD i është drejtuar Kuvendit me dy kërkesa, largimin e kryeparlamentarit Gramoz Ruçi dhe moslejimin e Arta Markut për shkarkime e lëvizje në organin e Akuzës.
“Prokurori i Përgjithshëm të kthehet në ligjshmëri. Prokurori i Përgjithshëm i Përkohshëm nuk ka kompetenca për shkarkime dhe transferime. Mazhoranca po kap drejtësinë. Saimir Tahirit iu kthye pasaporta, Orest Sota u lirua nga burgu, po mbyllen çështja ‘Xibraka’. Është shkelur rregullorja, janë falsifikuar votat, Gramoz Ruçi të largohet nga drejtimi i Kuvendit, është dhunuar e drejta e opozitës për të folur”, mësohet të kenë thënë demokratët në mbledhjen e grupit.
