Ka ardhur edhe reagimi i PD pasi ministrja për Fëmijët, Bora Muzhaqi, ka refuzuar të flasë për rastin e fundit të ndodhur në Fier dhe për masat që po merren për krimet seksuale.
Ka qenë deputetja e Partisë Demokratike, Ina Zhupa, e cila përmes një postimi në rrjetet sociale ka kërkuar dorëheqjen e ministres, Bora Muzhaqi.
Zhupa theksoi se Muzhaqi ka refuzuar që të japë sqarim në lidhje me regjistrin kombëtar për krimet seksuale dhe ngjarjen e rëndë, ku një fëmijë 8 vjeç u vra nga fqinji i tij në Fier.
Sipas demokrates, Muzhaqi nuk është e denjë të bëjë politika për fëmijët shqiptarë.
Në videon e mëposhtme dëgjohet edhe ministrja për Fëmijët kur thotë se nuk ka kohë.
“Dy realitete krejt të ndryshme kishte sot në Tiranë. Familjarët e Mateos, të dërrmuar nga dhimbja, që kërkojnë ndihmën e qytetarëve për të firmosur kthimin e dënimit me vdekje dhe Ministrja e Edi Ramës për fëmijët, që shpërfill me buzëqeshje dhimbjen e pamasë për vrasjen makabre të vogëlushit. Bora Muzhaqi ikën pa thënë asnjë fjalë për të, pa treguar aspak dhimbsuri, përulësi dhe përgjegjshmëri për detyrën e saj.
Kur të shihni videon, jam e sigurtë se do të revoltoheni njësoj si unë. Dhe nuk e them këtë, sepse unë jam deputete e opozitës, që shoh më të këqijat tek qeveria. Jam e revoltuar si nënë dhe si qytetare, kur shoh Ministren për Fëmijët të na përpalsë në fytyrë VKM-në e detyrave të saj.
Zonja Ministre! Ju sot duhet të jepni dorëheqjen, sepse nuk jeni e denjë të bëni politika për fëmijët tanë!
Jeta dhe mirëqenia e një fëmije është çështje shumë më e madhe sesa një VKM. Por ju këtë zonja Ministre nuk mund ta kuptoni, sepse jeni në atë detyrë jo për meritën tuaj, por sepse Edi Ramës i duhet buzëqeshja juaj!”-shkruan Zhupa.
