Partia Demokratike i ka kërkuar zyrtarisht Prokurorisë së Dibrës, informacion për dosjen ‘184’ që u transferua atje pak kohë më parë nga Krimet e Rënda.
Në kërkesën e dorëzuar me firmë të Sekretarit të Përgjithshëm, Gazment Bardhi, kërkohet që kjo dosje t’i kalojë për hetim Prokurorisë së Posaçme të SPAK duke qenë se atje, siç deklaron PD, është i faktuar bashkëpunimi në një grup të strukturar kriminal për vjedhjen e zgjedhjeve në Dibër.
“Në Qershor 2019, gazeta prestigjioze gjermane Bild, publikoi përgjime, pjesë të kësaj dosje hetimore, ku provohej qartë, jo vetëm veprimtaria kriminale për vjedhjen e zgjedhjeve vendore në Dibër, por edhe fakti se kjo veprimtari ishte e strukturar, në kuadër të një grupi të strukturuar kriminal, që drejtohej personalisht nga Edi Rama, Kryeministër i Shqipërisë dhe Damian Gjiknuri, deputet i Kuvendit të Shqipërisë”, thuhet në letrën e Sekretarit të Përgjithshëm të PD.
Në letër kërkohet në cilësinë e kallëzuesit që të merret informacion në lidhje me gjendjen e procedimit penal, faktit nëse Prokuroria e Dibrës ka shpallur apo jo moskopetencën dhe njohjen me provat dhe faktet e administruara deri tani.
Dosja ‘184’ ka për objekt hetimin e krimit zgjedhor në qarkun e Dibrës gjatë zgjedhjeve vendore të vitit 2017. Kjo dosje u transferua nga Prokuroria e Krimeve të Rënda në Prokurorinë e Dibrës në shtator të vitit 2019 për moskompetencë. Në prokurorinë e Dibrës ajo u regjistrua me emrin ‘385’dhe zgjati me 3 muaj afatet për hetim. Megjithatë nga ajo kohë ende nuk janë bërë të ditura detaje lidhur me këtë hetim.
Ndërkohë një nga personat e përmendur në këtë dosje edhe si pjesë e përgjimeve të publikuara nga ‘BILD’, ish-shefi i komisariatit të Dibrës, Robert Aga, është shkarkuar sot nga detyra e shefit të Qarkullimit të Dibrës pasi vëllai i tij Pajtim Aga u arrestua nga Policia gjatë një aksioni kundër trafikut të drogës. /Opinion.al
