Partia Demokratike i është drejtuar me një kërkesë Komisionit Qëndror të Zgjedhjeve që ti heqë mandatin kryetarit të Bashkisë së Vorës, Agim Kajmaku.
Në kërkesën që mban firmën e Sekretarit të Përgjithshëm të PD-së, Gazment Bardhi, theksohet se KQZ ka mbajtur këtë qëndrim në rastin e heqjes së mandatit të deputetëve Gledion Rahovica dhe Aqif Rakipi, të cilat sipas PD janë raste të njëjta me atë të Agim Kajmakut.
“Për prokurorinë është e provuar se Agim Kajmaku ka patur dijeni të plotë në lidhje me faktin që ka qenë në hetim penal në Greqi dhe se ndaj tij kishte një proces gjyqësor penal në zhvillim. Ai ka kryer veprime konkrete për fshehjen e këtij fakti para autoriteteve shqiptare”, thuhet në kërkesën e PD për KQZ-në.
Kërsa e cila i është dërguar për dijeni edhe Ambasadës së SHBA dhe BE në Tiranë, kujton se për mos deklarimin e arrestimit në Greqi nga Agim Kajmaku, ligji parashikon humbjen e menjëhershme të mandatit dhe dënimin e tij me deri në 4 vjet burg.
“Fakti që në Formularin e Vetëdeklarimit nuk është pasqyruar asnjë e dhënë e përcjellë në lidhje me arrestimin dhe hetimet përkatëse në shtetin grek, si dhe identitetin e rremë të përdorur nga vetë ai, bën që Agim Kajmaku të përfshihet në kushtet e ndalimit të ushtrimit të funksionit publik si Kryetar i Bashkisë. Kjo sjell përjashtimin e menjëhershëm dhe në çdo kohë nga funksioni publik që mban”, shprehet në kërkesën e tij Gazment Bardhi.
PD i bën thirrje KQZ-së që të zbatojë ligjin edhe për këtë rast dhe të mos bjerë pre e presioneve të kryeministrit Rama.
“Në këtë rast, anëtarët e KQZ-së duhet të zbatojnë ligjin dhe të mos i nënshtrohen urdhrave politikë të Edi Ramës, pavarësisht se ai është personi që ka emëruar në detyrë edhe Agim Kajmakun, edhe 4 nga 5 anëtarët e KQZ-së”, përfundon kërkesa e Partisë Demokratike. /Opinion.al
