Partia Demokratike deklaron se pjesëmarrja në votimet e 30 qershorit është manipuluar se dhe për këtë disponon fakte dhe të dhëna. Në një deklaratë në media, , sekretari i Përgjithshëm Gazmend Bardhi tha se skema e manipulimit ka funksionuar në formën e një piramide, nga Edi Rama, Denar Biba dhe deri tek komisionerët.
“Partia Demokratike disponon të dhëna të plota sesi ka funksionuar skema e manipulimit të numrit të pjesëmarrësve në votimet e paligjshme dhe antikushtetuese të 30 qershorit”
“Ajo ka funksionuar si një piramidë manipulimi, që nis me zyrën e Edi Ramës, vazhdon në zyrën e Denar Bibës, shtrihet tek drejtuesit e KZAZ-ve dhe përfundon tek komisionerët e qendrave të votimit në zonat ku nevojitej falsifikimi.
Në Komisionin Qendror të Vjedhjeve Denar Biba, në bashkëpunim me 3 punonjës të administratës, kanë drejtuar operacionin e rëndë kriminal të falsifikimit dhe manipulimit të votimeve.”
Sipas Partisë Demokratike rezultati është manipuluar duke rritur pjesëmarrjen me 8% ose rreth 280 mijë vota.
“Janë mbushur rreth 280 mijë fletë votimi për të plotësuar kuotat e përcaktuara nga Edi Rama dhe shtabi i tij i manipulimit te votimeve antikushtuese.”
Bardhi shtoi se KQZ ka zhdukur transparencën tradicionale të këtij institucioni duke mos publikuar asnjë të dhënë për pjesëmarrjen në qendrat e votimit megjithëse votimi ka 4 ditë që është mbyllur. Kjo fshehje të dhënash për mos të lënë gjurmë dhe shtimi artificial i votuesve përbën sipas PD krim elektoral dhe ata paralajmëruan ngritjen e një padie penale për Denar Bibën.
“Për të mbuluar këtë krim dhe për të mos lënë gjurmë, Komisioni Qendror i Vjedhjeve zhduku transparencën tradicionale të këtij institucioni.
Nuk hodhi të dhënat e pjesëmarrjes në sistemin online të të dhënave për të mos lënë gjurmë.
Nuk publikoi asnjë tabelë me rezultatet e votimit për çdo qëndër votimi.
Votimet me 1 kandidat dhe të paligjshme kanë përfunduar prej 4 ditësh, por Denar Biba me grupin e tij të krimit, si asnjëherë më parë, nuk kanë publikuar asnjë të dhënë për qendrat e votimit për asnjë bashki. Kjo është e paprecedentë.
Partia Demokratike ka vendosur të bëjë kallëzim penal për këtë krim masiv elektoral dhe për shpërdorim detyre duke nisur nga Denar Biba dhe duke përfunduar tek çdo kriminel tjetër pjesë e administratës së Komisionit që ka marrë pjesë në dhunimin e rëndë të ligjit, kushtetutës dhe demokracisë” thuhet në deklaratën e Partisë Demokratike. /Opinion.al
