Pandemia virale do të shoqërohet me një pandemi ekonomike nëqoftëse qeveria nuk merr masat, sipas ish-deputetes Jorida Tabaku.
Në një reagim në lidhje me pasojat ekonomike që mund të sjellë situata e koronavirusit, Tabaku thotë se qeveria nuk po menaxhon sic duhet situatën ekonomike e cila sipas saj trashëgon një krizë të thellë prej 7 vitesh.
Ajo thekson se qeveria duhet të anulojë koncesionet me PPP dhe t’ja kalojë atë buxhet rritjes së kapaciteteve për të testuar më shumë qytetarë. Tabaku deklaron se qeveria po tregohet kokfortë ndërkohë që ekonomia ka nevojë për frymëmarrje.
Sipas saj 100 mijë biznese të vogla rrezikohen nga kjo situatë dhe guhet një rrugëzgjidhje për 350 mijë profesionistë të lirë e për punonjësit që do të marrin më pak para si rrogë në fund të muajit.
Nga ana tjetër ajo nënvizon faktin se propozimet e PD për ekonominë kanë qenë konstruktive dhe në një vijë me ato të FMN-së.
“Njësoj si opozita dhe propozimet e saj mendon edhe FMN, e cila me një deklaratë të pak ditëve më parë i shprehu këto shqetësime që kaluan në heshtje. Me të drejtë vëmendja sot është e drejtuar për të mposhtur këtë pandemi, por vëmendja e qeverisë është për të manaxhuar pandeminë ekonomike që do pasojë këtë pandemi virale.
FMN në deklartën e saj nënvizonte se buxheti i shtetit nuk ka hapësirë për t’iu përshtatur krizave për shkak të keqmanaxhimit, borxhit të lartë dhe faktit se ajo ka angazhuar miliona euro në kontrata koncesionare me risk të lartë për buxhetin. Prandaj, sipas FMN, është e nevojshme që të manaxhohen fondet e tërmetit me transparencë dhe në ndihmë të atyre në nevojë.
Në të njëjtën linjë me PD edhe FMN ka sugjeruar se është e nevojshme të ndryshohet buxheti i shtetit për t’u mbështetur ata që më shumë kanë nevojë për të përballuar këtë situatë krize dhe pandemie. Prandaj ajo këmbëngul që kjo situatë mos përdoret për të cënuar ekonominë me amnisti fiskale të pandershme dhe antiligjore apo dhe mos përdorimin e ekonomisë për skema mafioze.
Propozimet e PD janë të drejta dhe realiste. Të ideuara për të stimuluar tregun e punës, për të kompensuar humbjen e të ardhurave tek biznesi familjar apo ai i prodhimit madje dhe për të nxitur konsumin. Nëse nuk mbështetet sot ekonomia kur do të mbështetet?”, shkruan ndër të tjera Tabaku. /Opinion.al
