Nesër është parashikuar të organizohet mbledhja për konstituimin e Këshillit të ri të Bashkisë Kavajë dhe marrja e mandatit të Kryetarit të Bashkisë, Redjan Krali, por Partia Demokratike ka paralajmëruar protestë gjysmë ore përpara se të fillojë mbledhja.
Mbledhja nga ku do të marrë mandatin Krali, i cili doli fitues në 30 Qershor, është lajmëruar për në orën 10:00 ndërsa në faqen zyrtare të PD në Kavajë paralajmërohet se në orën 09:30 do të zhvillohet protestë përballë Bashkisë.
“Ditën e nesërme ne orën 09:30 ju ftojmë te gjithëve përballë Bashkise se qytetit te protestojmë dhe te bllokojmë procesin ilegjitim te farsës se votimeve te 30 Qershorit!
Te gjithë së bashku në zbatim të dekretit të Presidentit të Republikës ti themi ndal instalimit të diktaturës në vendin tonë” shkruhet në njoftimin e PD Kavajë.
Bashkia Kavajë do të bëhet e dyta pas asaj të Devollit ku kryetari i ri do të marrë zyrtarisht mandatin. Situata mesa duket nuk pritet të jetë e qetë, ashtu siç ndodhi në Devoll, ku mbështetës të opozitës protestuan, duke thënë se 30 Qershori nuk është i ligjshëm. Kandidati i ri i Bashkisë Devoll mori mandatin në ambientet e prefekturës dhe ditë e sotme atje u paraqit edhe ish-kryebashkiaku Nallbati i cili deklaroi se bashkia është uzurpuar. /Opinion.al
