Partia Demokratike ka dorëzuar në Prokurori kallëzim penal për Policinë e Shtetit dhe Policinë Bashkiake. Sipas ish-deputetes, Jorida Tabaku kërkohet marrja e masave për sjelljen, siç e cilëson ajo brutale, joligjore e johumane gjatë të gjithë periudhës kohore të gjashtë muajve të fundit por veçanërisht gjatë mëngjesit të 9 Prillit ku fëmijë, gra e të moshuar u dhunuan barbarisht në gjumë nga shteti që duhet ti mbrojë.
“Një i moshuar 76-vjeçar u operua në kokë, dy zonja me gjymtyrë të thyera, gra e vajza në komisariat e një fëmijë vetëm 5 vjeç përfundoi më komisariat. Kjo sjellje kriminale e policisë duhet të marrë menjëherë përgjigje ligjore dhe urdhëruesit nga Kryetari i Bashkisë, Ministri i Brendshëm deri te Kryeministri duhet të vihen para drejtësisë. Këto sjellje prej banditësh të policisë që dhunën e ka për qytetarët dhe jo për krimin duhet të marrin fund njëherë e përgjithmonë bashkë me bandën në pushtet”, thotë Tabaku.
Banorët e “Bregut të Lumit”, që iu prishen shtëpitë nga vazhdimi i ndërtimit të “Bulevardit të ri” janë përplasur sërish me policinë këtë të mërkurë.
Forca të shumta policore ishin të pranishme në zonë, duke ndërhyrë për largimin me forcë të banorëve që nuk pranojnë të lënë shtëpitë e tyre.
Aksioni i prishjes ka nisur në orët e para të mëngjesit të sotëm, ku janë raportuar edhe konfrontime fizike. Në mbështetje të banorëve kanë shkuar edhe ish-deputetë të opozitës, të cilët janë konfrontuar gjithashtu me policinë./Opinion.al
