Sekretari i Përgjithshëm i Partisë Demokratike, Gazment Bardhi i është përgjigjur Rudina Hajdarit, e cila deklaroi zyrtarisht se nuk do të digjte mandatin. Kështu sipas zotit Bardhi, Rudina Hajdari nuk përfaqëson më Partinë Demokratike dhe nuk është më pjesë e kësaj force politike.
“Vendimi i Rudina Hajdarit është personal. Mandati është i demokratëve! Është e qartë se nga sot ajo nuk përfaqëson më Partinë Demokratike në Parlamentin e Krimit dhe për pasojë nuk është më as anëtare e Këshillit Kombëtar të PDSH. Kaq mjafton! Në rastin e Rudina Hajdarit, çdo vendim statutor është i panevojshëm, sepse formalisht ajo nuk rezulton e regjistruar si anëtare e Partisë Demokratike”, thotë Sekretari i Përgjithshëm i Partisë Demokratike.
Sipas zotit Bardhi, Azem Hajdari ka qenë, është dhe do të mbetet simbol i demokratëve dhe historisë së Partisë Demokratike. Ai thekson se beteja dhe amaneti Azemit për liri dhe demokraci është sot më aktual se kurrë, ndaj i përmend dhe vëllain, Kiri Hajdari që ishte në protestën e 5 Marsit të opozitës.
“Sakrifica sublime e Azem Hajdarit nuk do të shkojë dëm. Demokratët dhe qytetarët janë në këmbë për të mbrojtur Lirinë dhe Demokracinë, për të mos lejuar që shqiptarët të qeverisen nga krimi. Ata kanë folur qartë më 16 Shkurt dhe do të flasin edhe më qartë më 16 Mars: Shqipëria do të bëhet si gjithë Europa. Koha e Edi Ramës ka mbaruar!”/ Opinion.al
