Partia Demokratike i përgjigjet prokurorisë së Tiranës, në lidhje me akuzat e lobimit. Sipas kësaj partie, dalja me konkluzione hetimore ende pa përfunduar hetimin, si asnjëherë më parë në këto 30 vjet, tregon se Prokuroria po përdoret politikisht dhe po i shërben propagandës qeveritare kundër opozitës së vendit.
“Partia Demokratike nuk ka shkelur asnjë ligj dhe ka deklaruar të gjitha shpenzimet e kryera në vitin 2017. Pasi gënjeshtra e madhe që kishte ngritur për hetimin e Partisë Demokratike i plasi në dorë, pas informacioneve të ardhura nga SHBA dhe Skocia, Edi Rama në dëshpërim ka vendosur të përdorë sërish prokurorinë duke e kthyer nga institucion të ligjit në institucion qesharak propagande”, theksohet në reagimin e kësaj force politike.
LEXO EDHE– Prokuroria zbardh dy letërporositë: Pse morëm në pyetje Bashën
Këtë të hënë në organin e akuzës kanë qenë: Lulzim Basha, Gazment Bardhi, Ilir Dervishi, dhe Arben Ristani. Referuar letër porosive, prokuroria thotë, se ka një mospërputhje mes deklarimeve zyrtare të bëra nga PD, dhe shpenzimeve reale.
Sipas prokurorisë, PD ka deklaruar vetëm shumën prej 25 000 dollarësh, dhe nuk ka bërë deklarime për shumën prej 650 000 dollarësh. “Nga provat e administruara në dosje rezultojnë të jenë kryer dy pagesa në shumën prej 650 000 dollarësh për efekt lobimi në SHBA, të cilat nuk janë deklaruar ligjërisht nga subjekti PD. Njëra nga këto pagesa rezulton të jetë bërë nga një shoqëri e huaj dhe konkretisht Biniatta Trade, thuhet në njoftimin zyrtar të Prokurorisë së Tiranës. /Opinion.al
