Teksa Partia Demokratike nuk pranon zgjedhjet parlamentare të 11 majit dhe kërkon përsëritjen e tyre, deputeti Igli Cara, e jo vetëm, hedh akuza ndaj kampit rozë për manipulime e krime zgjedhore.
I ftuar në studion e “Përballë Lajmit”, në Klan News, Cara u shpreh se shqiptarët u përballën me vjedhje të votave, një e drejtë kjo themelore për të vënë në krye të shtetit forcën qeverisëse. Sipas Carës, Shqipëria po shkon drejt shuarjes, duke vënë peshën e përgjegjësisë për një diçka të tillë kampit rozë, teksa shton se mbetet problem për qytetarët intimidimi për votën nga ana e kryesocialistit, Edi Rama.
“Problemi i shqiptarëve nuk është qëndroi apo jo Berisha kryetar i Partisë Demokratike. Problemi i madh i shqiptarëve është se është hequr liria e votës. Është hequr e drejta e fjalës, e problemi më i madh i shqiptarëve është se ky vend po shkon keq e më keq. Po shkon drejt shuarjes. Nëse projekti i Ramës, duke intimiduar, duke ndryshuar rezultatin e zgjedhjeve, është të bëjë një Shqipëri ndryshe, ky është problemi kryesor i shqiptarëve. Nëse ne do të devijojmë, nuk e ka bërë opozita Shqipërinë më të varfër”, u shpreh demokrati.
Cara shton se është cenuar vota e shqiptarëve, e se në krye të shtetit ndodhet një parti që nuk është votuar prej tyre.
“Është prekur vota. Kemi një proces të deformuar dhe kjo është ajo që rëndon shqiptarët. Shqiptarët nuk kanë marrë atë që kanë votuar”, tha ai./tvklan.al
