Partia Demokratike ka reaguar pasi Sali Berisha prezantoi kandidatin e “Shtëpisë së Lirisë” për kryetar bashkie në Dibër në zgjedhjet e 6 marsit.
Në një njoftim për mediat PD shkruan se sot Sali Berisha poshtëroi dibranët, duke prezantuar Premtim Kryemadhin në garë për kryetar bashkie. PD thekson se ai është edhe bashkëshorti i prokurorës Belina Zeneli, e cila nuk hetoi ministrat dhe zyrtarët e Edi Ramës të dosjes “184″, për vjedhjen e votave në Dibër.
“Kandidatët e Shtëpisë së Ilirit, nuk përfaqësojnë demokratët. Ata përfaqësojnë korrupsionin që po e mban peng Shqipërinë. Dibranët e dinë mirë se si gruaja e kandidatit të Shtëpisë së Ilirit, nuk çoi para drejtësisë ministrat dhe zyrtarët e Edi Ramës që blenë dhe shantazhuan dibranët për vota. Demokratët dhe qytetarët dibranë, janë poshtëruar nga Berisha dhe Meta, të cilët përzgjodhën si kandidat pikërisht burrin e prokurores Belina Zeneli, e cila përveç Dosjes “184”, nuk i ka dhënë zgjidhje ligjore 33 procedimeve penale, si dhe nuk ka kryer asnjë veprim verifikimi në lidhje me 300 kallëzime të bëra nga qytetarët dibranë, duke i lënë ata pa drejtësi për hallet e tyre. Demokratët dhe qytetarët dibranë nuk mund të pranojnë kurrë njerëz të tillë. Ata e dinë se nëse zgjedhim Berishën dhe Metën, mbajmë Ramën”, thotë PD.
