Partia Demokratike ka akuzuar Kryeministrin e vendit Edi Rama për shpërdorim detyre dhe papërgjegjshmëri, me rastin e Kakavijës. Duke iu referuar dokumentit të bërë publik nga presidenti dhe njoftimit të palës greke që në 5 gusht për masat e reja, PD thotë se Rama është përgjegjës i drejtpërdrejtë i krizës humanitare që u krijua në Kakavijë.
“Edi Rama ka shpërdoruar detyrën në lejimin e krizës humanitare në pikën kufitare të Kakavijës, ku, tragjikisht, humbi jetën edhe një fëmijë. Kryeministri i vendit i cili është njëkohësisht edhe Ministër i Jashtëm fuqiplotë i Republikës së Shqipërisë, u informua që në datën 5 gusht zyrtarisht për vendimet e marra nga pala greke për të menaxhuar pandeminë me shtetasit që hyjnë në Greqi. 11 ditë më parë Edi Rama e dinte se çfarë do të ndodhte, por vazhdoi pushimet pa e vënë ujin në zjarr për mijëra shqiptarë që e pësuan prej neglizhencës së tij kriminale. Dokumenti i bërë publik nga Presidenti i Republikës, nxjerr në dritë neglizhencën dhe papërgjegjshmërinë e kryeministrit dhe Ministrit të Jashtëm Edi Rama. Ai nuk bëri asgjë. Shkoi me pushime luksoze dhe i la shqiptarët të dynden në pikën kufitare pa asnjë lajmërim, pa asnjë masë për të parandaluar atë katastrofë humanitare. Dokumenti i datës 5 Gusht tregon se Edi Rama është përgjegjës i drejtëpërdrejtë për atë që ndodhi në kufijtë tanë me shtetin fqinjë. Ai është përgjegjës për vuajtjet dhe humbjet që pësuan shqiptarët në pritje për të kaluar kufirin”, tha në një deklaratë, Sekretari për Çështjet Ndërkombëtare, Arben Kashahu.
Duke vijuar më tej, Kashahu iu referua fotos që Rama publikoi sot në tuiter, për radhët në kufirin greko-bullgar. Ai tha se kjo foto i përkiste shkurtit të vitit 2016.
“Tradhëtia e tij ndaj shqiptarëve vazhdon edhe sot, kur genjen duke i shitur fotot e 4 viteve më parë në kufirin Bullgaro-Grek si bllokim të kufirit sot, i cili ka zgjatur vetëm pak orë dhe pa arsye të ngjashme me Shqipërinë.
Shkrimi i i gazetës greke Kathimerini që paraqitet në foton e Edi Ramës sot, i përket 2 shkurtit 2016. Megjithatë, asnjë foto nga asnjë kufi tjetër i Europës nuk jusitikon dot dështimin e Edi Ramës dhe braktisjen e shqiptarëve. Edi Rama e dinte që në 5 Gusht shtrëngimin e masave në kufirin me Greqinë, por nuk gjeti kohë gjatë pushimeve luksoze në rezidencat qeveritare të bëjë qoftë edhe një postim në facebookun e tij për të informuar shqiptarët”, tha Kashahu duke shtuar se ky shpërdorim detyre solli si pasojë humbjen e një jete të pafajshme.
“Prokuroria e Posaçme është thirrur sërish në provë për të treguar se nuk është një strukturë në shërbim të qeverisë dhe se ka guximin të provojë si një organizëm i pavarur në shërbim të interesi publik”, përfundoi Kashahu./Opinion.al
