Përvjetori i 33-të i themelimit, e ka gjetur Partinë Demokratike të Shqipërisë të përçarë. PD zyrtare e Lulzim Bashës dhe PD e Sali Berishës kanë organizuar dy festa të ndryshme në kryeqytet.
Në Pallatin e Kongreseve, Bashës i janë bashkuar për të festuar ditëlindjen e PD figura të njohura si ish-Presidenti Bamir Topi dhe themeluesi Rexhep Uka.
Ndërkohë në ceremoninë e PD pa vulë, Berisha shoqërohej nga e bija Argita Malltezi, ndërsa mungonin aleatët si Fatmir Mediu e Dashamir Shehu, por jo PL që përfaqësohet me Silva Cakën.
Në fjalën e tij para të pranishmëve në sallën e Pallatit të Kongreseve, Lulzim Basha s’kishte si të anashkalonte faktin që lufta e brendshme në PD, ka bërë që 33-vjetori t’i gjejë të ndarë në dy kampe.
Me një mesazh të koduar drejtuar Sali Berishës, ai tha se shumë demokratë kanë mbetur të zhgënjyer prej atyre të cilëve u kanë dhënë shumë përgjatë viteve dhe që tashmë enden rrugëve duke ju trembur drejtësisë.
“Askush asnjëherë nuk do të mund ta bëjë pis ngjarjen historike të themelimit të PD. Askush dhe asnjëherë nuk do të mund ta fshijë sakrificën e themeluesve të saj. Mirënjohje për jetë studentëve dhe themeluesve të PD. Partia Demokratike është partia e shoqërisë së lirë shqiptare. E di që në këtë përvjetor nuk jemi aty ku ne donim të ishim. E di që në këtë përvjetor nuk i kemi në krah të gjithë. E di që shumë nga njerëzit që punuan dhe kontribuuan për partinë nuk janë këtu me ne. E di që në këtë përvjetor jemi zhgënjyer nga shumë për të cilët vetëm kemi dhënë në këto vite. E di që në këtë përvjetor një pjesë e jona sillet akoma rrugëve e verbuar nga interesi personal, e frikësuar nga gjykimi i historisë, e trembur nga dora e drejtësisë.”
Për ata që pyesin se e kujt është Partia Demokratike, Basha e bëri të qartë se forca politike që ai drejton është e Shqipërisë dhe theksoi se mbi të nuk ka për të vendosur askënd.
“E di që sot shumë qytetarë pyesin e kujt është Partia Demokratike. PD është partia e shoqërisë shqiptare, e vlerave euroatlantike, e rinisë europiane shqiptare. Në këtë datë të shënuar të përvjetorit të themelimit, pesha e ngjarjeve që kemi përjetuar ka lënë gjurmë te ne. Ngjarje me ngarkesa dhe sfida të mëdha për të gjithë ne këtu, por që në peshoren e kohës janë vetëm një çast. Vetëm një çast në historinë tonë 33-vjeçare si demokrat. Vetëm një çast në historinë tonë 33-vjeçare si properëndimor. Vetëm një çast në historinë tonë qindra vjeçare si shqiptarë patriotë, që mbi Shqipërinë nuk vendosim asgjë dhe askënd. Ne e kemi bërë zgjedhjen tonë, ne kemi zgjedhur Shqipërinë. Ndaj sot në këtë 33-vjetor ne deklarojmë me kokën lartë para çdo kujt që pyet e kujt është Partia Demokratike: Partia Demokratike është e Shqipërisë!”.
