PD ende ëndërron se një ditë mund të ndodhë mrekullia, me një fjalë, divorci mes PS-së dhe LSI-së. Për të mbajtur gjallë një ëndërr të tillë, kreu i PD-së Basha është drejtuar prej disa ditësh në Dibër me shumë gjasa për ta bërë sa më të besueshëm një skenar të tillë divorci.
Kanë mbetur vetëm 11 ditë deri në momentin e votimit për kryetar të Bashkisë në Dibër. Ajo çfarë bie në sy është se deri më sot, kur kanë mbetur vetëm 11 ditë, në fushatë nuk është parë asnjë përfaqësues i LSI-së, pjesëmarrëse në koalicion. Ulje-ngritjet e humorit mes LSI dhe PS kanë krijuar një klimë mosbesimi se koalicioni qeverisës do të zgjasë shumë.
Pikërisht ky tabor, është shansi i vetëm, për PD-në që të ndërtojë edhe njëherë tjetër ëndrrën e vetme të divorcit. Si në përrallat me kapërcim ylberi, fill pas kapërcimit, matanë ylberit ëndrrat janë ndezur. Menjëherë pas nuserimit, lart e poshtë, zërat u ngritën në ajër, për atë, të mosqoftën: divorcin.
Sepse “stacioni” më i parë ku bëhet “Vettingu” i koalicionit, Dibra në zgjedhje, po dëshmon se koalicioni ose është dëmtuar ose po shpërbëhet. Mirëpo, tema e kësaj gjëme, në radhë të parë, më tepër u pëlqen atyre personave që duan të bien disi në sy, duke menduar, se, nga boshësia e kësaj historie, nga hiçgjëja, mund të pillnin diçka. Ndërkaq, edhe pse ngjarja nis e sqarohet dita-ditës, një hije dyshimi i lë vendin një pyetjeje tjetër, po sikur…, sikur të ketë diçka pas kësaj?
Dyshimi lind, së pari, krejt natyrshëm. Pasi Socialistët nuk kanë lëshuar pe për një takim të mundshëm me LSI-në ku ajo pritej ti vinte kushtet e saj në këmbim të mbështetjes në zgjedhjet për Bashkinë e Dibrës.
Strukturat e PS-së dhe LSI-së nuk janë takuar ditën e hënë sipas kërkesës së LSI-së për takim për të rishikuar marrëveshjen e bashkëpunimit të 2015. Edhe pas shtyrjes që iu bë duket ende i pamundur një takim.
LSI ka bërë publike kërkesat e saj që pretendon të plotësohen në këmbim të mbështetjes së kandidatit të PS për Bashkinë e Dibrës. LSI kërkon 160 vende pune për militantët e saj, fonde për realizimin e premtimeve, tre qendrat administrative dhe nënkryetarin e bashkisë në Dibër.
Mirëpo, politika na ka mësuar se në Shqipëri gjithçka lejohet dhe kur gjithçka lejohet, gjithçka mund të ndodhë. Në pamje të parë mund të duket se, divorci socialist, pra ky farë divorci, më tepër sesa i tillë, është duam apo s’duam ne, një para divorc, është një e zemë se u ndamë, por pikërisht për këtë, për faktin se është një hamendësim, një e zemë, merr një vlerë të veçantë, një vlerë të një lloji tjetër, të rrëzikshme do të thonim./Opinion.al/ Reldar Dedaj
