Partia Demokratike kallëzoi në Prokurorinë e Përgjithshme Kryeministrin Edi Rama për kryerjen e tre veprave penale, atë të mashtrimit, pastrimit të parave dhe ushtrim i ndikimit të paligjshëm.
Deputeti Eduart Halimi tha se me pagesën e 80 mijë dollarëve për të financuar fushatën e presidentit Obama dhe për të bërë një foto me të, kryeministri Rama duhet marrë si i pandehur nga organi i akuzës.
Halimi tha se rasti i kryeministrit Rama është i ngjashëm me atë të ish- kryeministrit rumun, Victor Ponta, i vënë nën hetim në vendin e tij.
Eduart Halimi, deputet i PD-së: “Të gjitha faktet e mbledhura nga institucionet amerikane tregojnë se paratë kanë ardhur drejtpërdrejt nga Shqipëria nëpërmjet llogarive bankare dhe janë të dërguara nga shtetasi nr 2 që është Edi Rama. Tani është momenti që Prokuroria të thërrasë kryeministrin, i cili është i detyruar t’u japë përgjigje pyetjeve të opozitës.”
Pas padisë së opozitës ka reaguar edhe kreu i qeverisë përmes drejtorit të Komunikimit në kryeministri. Në deklaratën e shpërndarë për mediat thuhet se padia e PD tregon përpjekjen e dëshpëruar të Partisë Demokratike për të mos u përballur me nevojën reale të vendit sot, që është Reforma në Drejtësi.
Kreu i qeverisë ka sqaruar sërish se nuk ka lidhje me asnjë lloj financimi të paligjshëm dhe i vetmi “krim” që ka bërë në vitin 2012 është se ka dalë në fotografi me Presidentin e SHBA-ve, në një kohë kur sipas tij, qeveria e Shqipërisë shpërdoronte miliona dollarë nga taksat e shqiptarëve, për të lobuar në SHBA jo për Shqipërinë, po për përbaltjen e Partisë Socialiste dhe Edi Ramës me artikuj dizinformues të porositur e të paguar nga Tirana.
Kryeministri Rama i bëri thirrje Partisë Demokratike që përveç propagandës së baltës të merret seriozisht me nevojën historike të vendit për Reformën në Drejtësi. Pasi sipas tij një drejtësi e çliruar nga kthetrat e korrupsionit politik e financiar, do të çlirojë më në fund edhe të vërtetën e gjithë akuzave të Partisë Demokratike si edhe të vërtetën e krimeve të pandëshkuara në gjithë këto vite!
