Ministrja e Mbrojtjes, Olta Xhacka ka reaguar në lidhje me kallëzimin penal që njoftoi sot Partia Demokatike ndaj saj.
LEXO EDHE – Tenderi i ushqimeve, PD kallëzon Xhaçkën në SPAK për 6 vepra penale
Ajo shkruan se e mirëprejt padinë dhe fton SPAK që ta hetojë me përparësi këtë cështje.
“I takon SPAK të hedhë dritë mbi këtë çështje me të gjithë urgjencën që dikton situata e luftës ku jemi. Kemi bërë çdo gjë sipas ligjit e procedurës”, shkruan ministrja.
Megjithatë ajo i cilëson akuzat e opozitës shpikje të modelit Babale dhe shton se ato bëhen për të sabotuar luftën kundër koronavirusit.
Reagimi i Ministres së Mbrojtjes, Olta Xhacka
E mirëpres padinë e PD dhe e inkurajoj SPAK që ta hetojë me përparesi këtë akuzë sepse sot qytetarët kanë shumë nevojë për qartësi. PD ka të drejtë kur thotë që do të ishte veçanërisht e ulët e kriminale nëse një ministër do të përfitonte nga pandemia për të bërë korrupsion. Por është po aq e ulët e imorale nëqoftëse opozita e një vendi në kohë lufte, jo vetëm s’kontribuon në përpjekjen e përbashkët për të mundur armikun e për të shpëtuar jetë, por vazhdon me shpikje të modelit Babale në një përpjekje për të sabotuar luftën e minuar përpjekjen tonë të përbashket për t’i bërë ballë me sa më pak humbje e vuajtje armikut të padukshëm! I takon SPAK të hedhë dritë mbi këtë çështje me të gjithë urgjencën që dikton situata e luftës ku jemi. Kemi bërë çdo gjë sipas ligjit e procedurës dhe jam optimiste se në fund të hetimit qytetarët do të kuptojnë qartë si drita e diellit se kjo akuzë s’është veç rivënia në skenë e versionit më të fundit të Babales. /Opinion.al
