Dega e Partisë Demokratike në Durrës ka akuzuar ish-kryetarin e Bashkisë, Vangjush Dako se ai është në krye të ‘piramidës së ndërtimeve’ në këtë qytet këto dhjetë vitet e fundit.
“Piramida e krijuar nga Dako firmoste për ndërtimet, shiste beton për ndërtimet, supervizonte ndërtimet, firmoste dhe vuloste për të dhënë financimet”, shkruhet në deklaratën e Ferdinant Xhaferajt.
Në reagimin në faqen zyrtare në Facebook, kreu i PD-së së Durrësit i cilëson personat që u ndaluan nga policia si ‘cironka’. Sipas tyre lidhja e ish-kryebashkiakut të Durrësit me kryeministrin Rama bën që ai të mos hetohet.
Statusi i plotë i degës së PD-së në Durrës
Për më shumë se një dekadë në krye të piramidës së ndërtimeve dhe masakrës urbane në Durrës ka qenë kreu i Bashkisë së Durrësit, Vangjush Dako. Prokuroria ka investiguar për më shumë se dy javë dhe puna e saj, sa intensive aq edhe profesionale, ka rezultuar në ndalimin e cironkave të përgjegjësisë për dramën që po kalon qyteti. Dako dhe shpura e tij nuk mund të hetohen nga prokuroria sepse Dako është pranë Ramës dhe me Ramën, që nga Durrësi deri në Stamboll.
Piramida e krijuar nga Dako firmoste për ndërtimet, shiste beton për ndërtimet, supervizonte ndërtimet, firmoste dhe vuloste për të dhënë financimet.
Por Dako është jashtë juridiksionit të prokurorisë, për faktin e thjeshte se është nën juridiksionin e Ramës.
Ferdinant Xhaferaj. /Opinion.al
