Agron Gjekmarkaj, tashmë deputet i Partisë Demokratike në Lezhë, në një intervistë televizive ka komentuar rezultatin e zgjedhjeve të 25 prillit dhe fushatën elektorale të zhvilluar nga PD. Gjekmarkaj tha se zgjedhjet janë trukuar, e për këtë, deklaroi se PD disponon prova të mbledhura të gjitha në një dosje.
“Unë di të them që zgjedhjet në Shqipëri janë trukuar në mënyrë të frikshme dhe do të habiteni kur të dalë dosja me denoncime. Ju e patë si në Elbasan, prokuroria dhe policia thanë që s’kishte indicie të shit-blerjes së votës, ndërkohë një gazetar nxori që kishte të gjitha shenjat korrupsionit elektoral. Kjo ka ndodhur në të gjithë Shqipërinë, në terren ka ndodhur kjo, sepse e kam parë vetë. Ka patur kudo tendenca dhe veprimtari të qartë në shit-blerjen e votës, këto nuk deklarohen sepse kanë frikë. Policia duke përdorur orën policore, pas orës 22:00 ndalonte makinat e opozitës dhe lejonin lirshëm makinat e PS. PD shkoi në një proces elektoral demokratik. Do të keni një dosje të plotë”,- tha Gjekmarkaj në news 24.
Më tej, ai deklaroi se Lulzim Basha duhet të kishte krijuar një ekip më bindës në listën e Tiranës, pasi sipas Gjekmarkaj Basha u tregua shumë “zemërgjerë” me aleatët.
“Zoti Basha ka bërë një fushatë spektakolare, me një program ndër më të mirët e këtyre 30 viteve. Korrekt, i konsultuar me ndërkombëtarët. Pati një diskurs etik dhe bindës me qytetarët. Mbase duhet të kishte një ekip më bindës, në Tiranë… Me aleatët duhet të kishte një formulë tjetër. U tregua zemërgjerë me aleatët, se Tirana është më ndryshe”, tha Gjekmarkaj./Opinion.al
