Kandidati për deputet i PD në qarkun e Dibrës, Basir Çollaku ka kallëzuar në polici se një furgon me disa persona të panjohur, po shpërndante produkte me qëllim favorizimin e subjekteve politike.
Pas këtij kallëzimit, uniformat blu bëjnë me dije se kanë ndaluar shoferin e furgonit dhe e kanë shoqëruar në komisariatin e Matit.
Mësohet se nga këqyrja dhe kryerja e veprimeve hetimore nuk u konstatua asnjë send apo veprim i kundraligjshëm.
“Më datë 08.04.2025, është paraqitur dhe ka bërë kallzim shtetasi B.Ç., 56 vjeç, banues në Tiranë, kandidat për deputet në Kuvendin e Shqipërisë pasi dyshonte se në fshatin Bushkash, Mat, disa persona të panjohur nga ana e tij, po shpëndanin produkte të ndyshme me një automjet (furgon), me qëllim favorizimin e subjekteve politike.
Menjëherë pas administrimit të kallzimit, shërbimet e Komisariatit të Policisë Mat, kanë bërë shoqërimin e drejtuesit të automjetit shtetasi F.L., sëbashku me automjetin e tij furgon, ku nga kqyrja dhe veprimet hetimore nuk u konstatua asnjë send apo veprim i kundraligjshëm”, njofton policia.
Të gjitha veprimet janë kryer në drejtimin e Prokurorisë Pranë Gjykatës së Shkallës së Parë të Juridiksionit të Përgjithshëm Dibër.
