Partia Demokratike ka deklaruar se janë shfaqur një sërë problematikash, lidhur me mënyrën e administrimit të procesit të votimit për shtetasit shqiptarë që jetojnë jashtë vendit.
Gjatë një konference për shtyp, e deleguara politike e PD-së për Diasporën, Jozefina Topalli, dhe përfaqësuesi ligjor i partisë në KQZ, Franc Nuri kanë renditur shqetësimet kryesore.
Sipas PD-së, një problem i theksuar është përfshirja e individëve të paautorizuar në grumbullimin dhe kthimin e zarfeve në disa zona të Greqisë, të cilët pretendojnë se kanë vepruar në marrëveshje me DHL.
“Përfshirja e individëve të paautorizuar në Greqi në grumbullimin dhe kthimin e zarfeve të votimit: Individë në Hania (Kreta) dhe zona të tjera pretendojnë në rrjete sociale se kanë bërë ‘marrëveshje me DHL’ për të shpërndarë ose kthyer zarfet e votimit për shqiptarët në Greqi.
Këto veprime, të paraqitura si ‘shërbim komunitar’, përbëjnë shkelje të rëndë të parimit të votimit të fshehtë dhe individual, dhe janë të dënueshme sipas legjislacionit shqiptar zgjedhor. Organizimi kolektiv dhe ndërhyrja e paautorizuar në procesin e votimit cenon drejtpërdrejt integritetin e procesit dhe hap rrugë manipulimeve. Autoritetet duhet të ndërhyjnë menjëherë për të hetuar dhe ndjekur penalisht këto veprime të organizuara”, tha Nuri.
