Nga selia blu, sekretari për çështje zgjedhore i Partisë Demokratike Ivi Kaso, deklaroi se po falsifikohet numri i pjesëmarrësve në votime. Sipas tij kryeministri Edi Rama po përdor KQZ për të keq informuar opinionin publik në lidhje me shifrat faktike për pjesëmarrjen. Ai shtoi gjithashtu se nuk po raportohen shkeljet që po ndodhin gjatë procesit zgjedhor siç janë votimet më shumë se një herë nga i njëjti person.
“Operacioni më i madh që po kryen Edi Rama gjatë gjithë ditës së sotme është falsifikimi i pjesëmarrjes në votimet e tij një partiake dhe të paligjshme. Komisioni Qendror i Zgjedhjeve është në krye të këtij operacioni manipulimi, duke mashtruar shqiptarët dhe partnerët për numrin e vërtetë të atyre që kanë votuar”
“Arsyeja se pse KQZ nuk evidenton, ndalon dhe raporton shkeljet flagrante të ligjit, që nga votuesit shëtitës që votojnë disa herë, deri tek komisionet e votimit me nga 1 anëtarë që mbushin kutitë e votimit, që nga votimi në grup deri tek votimi i hapur, raste të gjitha të denoncuara nga media, është sepse KQZ-ja është një vegël e paligjshme në duart e Edi Ramës dhe në shërbim të farsës së gatuar prej tij” tha Ivi Kaso
Para pak minutash KQZ doli në një deklaratë për mediat ku informoi se përqindja e votuesve në rang vendi për momentin është 15.5%. Kjo shifër sipas Kasos është e rreme.
“Nga monitorimi i të gjitha qendrave të votimit, ka rezultuar se pjesëmarrja faktike në rang vendi deri në orën 11 ka qenë 6% dhe jo 12% siç raportuan kamikazët e KQZ. Pjesëmarrja faktike deri në orën 3 pasdite është 10 për qind” deklaroi Kaso. /Opinion.al
