Partia Demokratike ka denoncuar kryetarin e Bashkisë së Tiranës, Erjon Veliaj dhe qeverinë se i ka dhënë nipit të deputetit socialist Sadri Abazi tendera me vlerë 13.9 milionë euro.
Përmes një deklarate për mediat, zëdhënësja e PD-së, Ina Zhupa deklaron se 4.8 milionë euro kontrata ka përfituar kompania e Arbër Abazit nga Autoriteti Rrugor Shqiptar vetëm këtë vit.
Sipas Zhupës që kur Erion Veliaj mori drejtimin e Bashkisë së Tiranës, kompania e nipit të Sadri Abazit ka marrë tendera me vlerë 9.1 milion euro. Po ashtu Zhupa denoncon se kjo kompani po shfrytëzon metra katrorë në ish-Parkun e Automjeteve Kombinat, Rr. e Fabrikës së Qelqit, ku parkon të gjitha automjetet dhe mjetet teknologjike, për të cilat një biznesi i duhet të paguajë 2 deri 3 milion lekë në vit
Deklarata e plotë
Kompania Alko Impex në pronësi të Abër Abazit, nipit të deputetit socialist Sadri Abazi, vijon të vjelë begatitë e tenderave nga Bashkia e Tiranës dhe qeveria, konkretisht Autoriteti Rrugor Shqiptar. 4.8 milion euro kontrata ka përfituar kjo kompani nga Autoriteti Rrugor Shqiptar vetëm këtë vit. Që kur Erion Veliaj erdhi në krye të bashkisë së Tiranës, kompania e nipit të Sadri Abazit ka marrë nga kjo bashki tendera me vlerë 9.1 milion euro, nga të cilat 6.2 milion euro kontrata si operator i vetëm dhe 2.9 milion euro në kontrata ku Alko Impex është operatori kryesor i konsorciumit.
Por favoret dhe paratë publike që Erion Veliaj i dhuron bujarisht kompanisë së Arbër Abazit nuk mbarojnë këtu. Kompania Alko Impex shfrytëzon mijëra metra katrorë në ish-Parkun e Automjeteve Kombinat, Rr. e Fabrikës së Qelqit, ku parkon të gjitha automjetet dhe mjetet teknologjike. Një biznesi i duhet të paguajë 2 deri 3 milion lekë në vit për një vend parkimi në Tiranë. Pra, kompania e nipit të Sadri Abazit shmang në këtë mënyrë pagesën e dhjetëra apo qindra miliona lekëve çdo vit.
Për çudi, parkingun e saj të paligjshëm nuk e shikon policia bashkiake e Tiranës, të cilës nuk i shpëtojnë as arkat me domate apo qeset me majdanoz që shiten për të fituar bukën e gojës. Siç e shihni, kjo kompani vjedh qytetin me aprovimin e heshtur të Bashkisë dhe institucioneve të zbatimit të ligjit. Kompania e Arbër Abazit është e njohur tashmë për shkathtësinë e saj për të fituar tendera qeveritarë me dokumentacion false e procedura të dyshimta./Opinion.al
