Ish-deputeti demokrat Luçiano Boçi ka denoncuar përdorimin e mësuesve dhe të nxënësve nga Bashkia e Tiranës për festimet e Ditës së Verës.
Nëpërmjet disa mesazheve që i kanë ardhur elektronikisht, Boçi shkruan se “Propaganda bajate kërkon të stimulojë imazhin e një Shqipërie fanar lumturie e së cilës po i “plas gëzimi dhe e mira nga sytë”. Por ndërrimi grotesk i kalendarit të ditës së verës nga 14 Mars në 17 Mars nuk është i padëgjuar. Ka ndodhur në Korenë e Veriut. Koreja e Veriut është në vitin 108, jo 2019, sepse vendi i shënon vitet sipas kalendarit Juche, i cili u prezantua në vitin 1997 dhe bazohet në datën e lindjes së Kim Il-sung: 15 prill 1912. Viti 1912 përdoret si Juche 1 dhe nuk ka Juche 0. Tiranën sot do ta ketë zili vetë Pheniani!!!!”
Boçi ka postuar edhe disa prej mesazheve, ku mësuesve u kërkohet të jenë që në orën 9 të mëngjesit në Shesh të organizuar me klasat e tyre. Tirana e feston sot Ditën e Verës, pasi Bashkia e shtyu festën për shkak të motit jo të favorshëm ditën e enjte, më 14 mars./Opinion.al
