Partia Demokratike ka dënuar sulmet ndaj drejtuesit të Institutit për Studimin e Krimeve dhe Pasojave të Komunizmit, Agron Tufa. Në një deklaratë për mediat, PD thotë se duhet avancuar me procesin e dekomunistizimit dhe akuzon kryeministrin Edi Rama se po i imponon Parlamentit shkrirjen e këtij Instituti të pavarur që punon për zbardhjen e krimeve gjatë periudhës së diktaturës.
“Partia Demokratike denoncon veprimet e Edi Ramës me sulmet ndaj Institutit për Studimin e Krimeve dhe Pasojave të Komunizmit, ndaj Bordit të Institutit, si dhe ndaj drejtorit ekzekutiv Agron Tufa për shkakun e vetëm, se ky institucion i pavarur po punon për të zbuluar të vërtetën e krimeve të komunizmit. Në këto 6 vite të drejtimit të Shqipërisë nga Edi Rama, enverizmi ka forcuar pozitat e tij në vend. Këngë, filma, dokumentarë, simbole e xheste publike që glorifikojnë diktatorin komunist Enver Hoxha dhe regjimin e tij çnjerëzor, janë kthyer në normalitet gjatë qeverisjes së Ramës. Sulmi ndaj këtij Instituti është i frymëzuar nga ish-oficerët dhe bashkëpunëtorët e Sigurimit të Shtetit, të cilët kanë marrë drejtimin e Policisë, të Shërbimit Informativ dhe të organeve të reja të drejtesisë”, thuhet ndër të tjera në deklaratën e Partisë Demokratike.
Prej disa ditësh, eksponentë të mazhorancës kanë sulmuar Institutin për Studimin e Krimeve dhe Pasojave të Komunizmit si edhe shkrimtarin Agron Tufa, që e drejton.
Fillimisht ka qenë deputeti Spartak Braho që ka kërkuar shkarkimin e Tufës, me pretendimin se po rehabiliton kolaboracionistët dhe po shtrembëron historinë. Pas kësaj, disa figura publike u angazhuan në media kundër Agron Tufës, gjë që solli edhe padinë në gjykatë të këtij të fundit.
Agron Tufa ka thënë se ka marrë kërcënime vazhdimisht nga ish-eksponentë të Sigurimit të Shtetit dhe të nomenklaturës komuniste./Opinion.al
