Protesta e radhës e opozitës duket se do të jetë e motivuar edhe më shumë pas publikimit të përgjimeve nga gazeta gjermane Bild. Nga selia e PD-së, Enkeljed Alibeaj tha se opozita nuk pret largimin e Ramës, pasi sipas tij kryeministri tani është në aksion për të mbrojtur vjedhësit e votave.
“Por, kur bëhet fjalë për pushtetin dhe mbajtjen e tij në çdo formë e me çdo mjet, Edi Rama, është krejt i parashikueshëm dhe nuk zhgënjen asnjëherë. Kryeministri ilegjitim, i ardhur në pushtet me votat e blera nga krimi, siç konfirmuan edhe përgjimet e fundit të gazetës Bild, jo vetëm nuk po e konsideron dorëheqjen, por është vënë në mbrojtje të Vangjush Dakos, duke arritur deri tek kërcënimi publik i kujtdo që nxjerr sekretin e bashkëpunimit me krimin për blerjen e votave”, tha ish deputeti demokrat.
Akuza të forta hodhi dhe në drejtim të organit të akuzës.
“Pas përgjimeve të Bild, që faktojnë blerjen e pushtetit përmes krimit, është e qartë pse Edi Ramës i duhej prokuroria nën kontrollin e plotë të tij. Një prokurori e pavaruar, do të kishte zbatuar ligjin, do t’i kishte vënë para drejtësisë pushtetarët e lidhur me krimin dhe të përfshirë në afera të rënda korruptive”, tha Alibeaj.
Thirrja e tij për shqiptarët ishte për protestën e 8 qershorit: Pjesëmarrja dhe vendosmëria e shumicës së shqiptarëve për të mos pranuar paktin e tij me krimin, është përgjigja më e mirë për kryeministrin ilegjitim të votave të blera me krimin./ Opinion.al
