Deputetja e Partisë Demokratike, Dhurata Çupi të dielën deklaroi nga selia e kësaj partie se qeveria socialiste ka emëruar në poste të rëndësishme diplomatike familjarë të ish-Byrosë Politike.
Çupi u shpreh se ministri Ditmir Bushati, i biri i Sul Bushatit, zbaton të njëjtat kritere siç bënte dikur i ati në diktaturë, duke emëruar familjarë të ish-krerëve të regjimit komunist në poste të larta diplomatike.
Ajo tha se rasti i fundit është ai i emërimit të ambasadorit të Shqipërisë në Suedi të Virgjil Kules, dhëndri Rita Markos.
“Mbesa e Hysni Kapos është emëruar ambasadore në UNESCO. Dhëndri i Lenka Çukos ambasador në Izrael. Për të rinjtë që nuk i njohin, këta janë njërëzit që, bashkë me Enver Hoxhën, burgosën dhe vranë kundërshtarët e regjimit të tyre gjakatar, shtypën dhe sunduan për gati 5 dekada shqiptarët, duke na varfëruar deri në mjerim, duke na grabitur pronën, duke na mohuar të drejtat dhe identitetin tonë europian. Asnjë nga këto emërime nuk është rastësi! Edi Rama e konceptoi Rilindjen si bashkim mes krimit dhe pinjollëve e funksionarëve të regjimit komunist, duke nisur nga ai vetë”, akuzoi deputetja demokrate, Dhurata Çupi.
