Partia Demokratike ka bojktuar edhe Komisionin Hetimor për Sterilizimin dhe Check Up, si shenjë proteste për burgosjen e Ervin Salianjit, i cili po vuan dënimin me 1 vit pas hekurave në burgun e Fierit.
Drejtimin e Komisionit e ka marrë nënkryetari Plarent Ndreca, i cili thotë se kanë detyrimin të vijojmë mbledhjen në respekt të vendimmarrjes që kanë marrë si Komision.
“Sot është mbledhja e radhës e dakordësuar edhe me kryetaren e Komisionit, edhe me përfaqësuesit e opozitës, me vendimmarrje përkatëse nga Komisioni. Ky është zbatim i vendimit për thirrjen e dëshmitarëve.
Kemi detyrimin të vijojmë mbledhjen në respekt të vendimmarrjes që kemi marrë si Komision. Me keqardhje për mosprezencë të opozitës, por është vendimmarrje politike, as nuk na përket dhe as nuk duhet ti përkasë këtij komisioni”, tha ai.
Ndërkohë nga ana tjetër, Vokshi përmes një mesazhi ka kërkuar që mbledhja mos të zhvillohej pa dëshmimtarë.
Ajo ka akuzuar mazhorancës, që sipas saj, po përndjek mjekët dhe po i urdhëron të vinë në Komision me urdhër.
“Përshëndetje kolegë,
Pas refuzimit të kërkesave të përsëritura nga ana ime për të mos u zhvilluar mbledhja e djeshme, dhe zhvillimit të njëanshëm të mbledhjes dhe uzurpimit të drejtimit të Komisionit pa konsensusin e opozitës, ju njoftoj që ne nuk japim më konsensus për t’u zhvilluar mbledhjet e Komisionit Hetimor nën drejtimin e Maxhorances.
Cdo mbledhje e organizuar pa konsensusin tonë nuk do njihet prej nesh e do të jetë NUL”, shkruan Vokshi.
