Pasi Partia Demokratike publikoi dokumentet se kryebashkiaku i Vorës, Agim Kajmaku, ka patur probleme me drejtësinë greke, Prokuroria e Përgjithshme ende nuk ka nisur procedim penal ndaj tij.
Ish-deputeti Klevis Balliu, në një deklaratë për mediat akuzoi kryeprokuroren Arta Marku se nuk po vepron për shkak të interesit që ka për tu rizgjedhur në krye të organit të akuzës.
“Megjithëse provat tashmë i ka në dritë të diellit, Arta Marku e përfshirë nga ethet e konfirmimit, kërkon nga PD të dhënat që i ka në sistem.” tha Balliu.
Rreth një javë më parë PD publikoi vendimin e gjykatës së Janinës në të cilin tregohej se Agim Kajmaku, në atë kohë me emrin Jorgo Toto, ishte arrestuar për falsifikim kartëmonedhash dhe ndaj tij ishte dhënë masa e arrestit me burg. Pas kësaj dolën në dritë dokumente të tjerë që tregonin se Jorgo Toto dhe Agim Kajmaku ishin i njëjti person, në bazë të numrit të identifikimit të pasaportës.
“Sipas dokumentacionit zyrtar të autoriteteve greke rezulton e provuar se shtetasi Agim Kajmaku alias Jorgo Toto i është shmangur drejtësisë greke për përballjen me një akuzë, që parashikon të paktën 10 vjet burg. Përveç kësaj ai ka mashtruar në formularin e dekriminalizimit, veprim ky që përbën vepër penale dhe prokuroria duhet të nisë menjëherë procedim penal ndaj të zgjedhurit të Ramës në Vorë” deklaroi Balliu.
Pas akuzave të PD se Agim Kajmaku kishte gënjyer në formularin e dekriminalizimit, Prokuroria e Përgjthshme deklaroi fillimisht se do të kërkonte konfirmim nga organet vendase dhe fqinje për këtë akuzë. Më pas nga zyra e dekriminalizimit u tha se Kajmakut i janë kërkuar të depozitojë shenjat e gjurmët dhe më pas do të nis verifikimi për të.
Gjurmët e gishtërinjve, Agim Kajmaku nuk i dorëzoi sipas Prokurorisë dhe në fakt sipas ligjit organi i akuzës e kërkon depozitimin e tyre vetëm kur ato nuk janë në sistemin biometrik të të dhënave. Por Prokuroria e Përgjithshme nuk i tërhoqi në sistem shenjat e gishtërinjve por kërkoi me kërkesë drejtuar Partisë Demokratike të gjithë dokumentacionin e saj në lidhje me Kajmakun.
Balliu deklaroi sot se Prokuroria e Përgjithshme ka akses në të gjitha burimet e dokumenteve që ka Partia Demokratike lidhur me Agim Kajmakun. /Opinion.al
