Partia Demokratike reagon pas lajmit të qeverisë për rritjen e pagave të mësuesve. Deputeti Luçiano Boçi tha se “3 vitet e fundit arsimi u bë si tryeza e cakenjve, ku Edi Rama ndan copa me aleatët e tij, në një luftë që ka për synim të kapë sa më shumë vende pune, dhe nuk ka aspak parasysh mësimdhënien”.
“Simboli rilindas për arsimin është Luiza që nuk kërkonte mijëra euro për një vend pune, por edhe trafikonte mësuese për dëshirat e shefave në Tiranë”, vijoi ai.
Sipas Luçiano Boçit, Rama vazhdon të fyejë nxënësit dhe prindërit e tyre duke i quajtur mbi 100 mijë prej tyre si analfabetë.
“Partia Demokratike mbështet cdo investim në arsim, por në këto 3 vite nuk pati asnjë rritje page për arsimtarët, të cilët u kërcënuan me vendin e punës për të dhënë votën për Edi Ramën, sic e thotë raporti i OSBE-ODIHR e sic ndodhi në zgjedhjet e fundit në Dibër. Në këto tre vite nuk u ndërtua asnjë shkollë e re. Këto të vërteta për arsimin i dinë mësuesit, nxënësit dhe prindërit dhe nuk mbulohen dot nga llomotitje më shumë se 1 orëshe e Edi Ramës”, tha deputeti demokrat, duke shtuar se “arsimi do jetë më mirë pa Ramën”.
