Luçiano Boçi, Kreu i Departamentit të Arsimit në PD ka deklaruar sot se PD, në mbështetje të maturantëve që u është bërë padrejtësi me sistemin e ri të pëzgjedhjes në Universitete, mirëpret dokumentacionet e maturantëve që kanë ankesa.
Partia Demokratike ka nisur kështu aksionin për të mbështetur në mënyrë ligjore çdo maturant që nuk ka marrë atë që meriton nga skema e re.
Boçi ka ftuar çdo maturant që i nevojitet përkrahje ligjore për rastin e tij, që ti drejtohet ekspertëve të PD për dërgimin e çështjes në Gjykatë.
NJOFTIMI
Po ndjekim hap pas hapi zgjidhjen e padrejtësisë që i është bërë maturantëve.
Në përgjigje të qindra denoncimeve pranë Partisë Demokratike dhe kërkesave konkrete të tyre dhe familjarëve, Partia Demokratike do të japë mbështetje të plotë juridike për çdo ankesë të depozituar.
Cilido maturant, të cilit i nevojitet përkrahje ligjore për rastin e tij, do të gjejë pranë Partisë Demokratike ekspertët e duhur për dërgimin e çështjes në gjykatë.
I bëjmë thirrje çdo maturanti që të paraqesë dokumentacionin përkatës pranë Partisë Demokratike, ose në portalin që është hapur për maturantët
“Padrejtësia ndaj maturantëve, trego rastin tënd”. Po kështu po shqyrtojmë dhe përgatisim edhe hapa të tjerë juridikë dhe kushtetues.
Duke kuptuar kaosin dhe ankthin e kësaj situate, ju sigurojmë që vetëm përpjekja jonë e përbashkët, do të sjellë e vendosë drejtësi dhe meritokraci për maturantët. Ti sprapsim së bashku hajdutët e të ardhmes së rinisë.
