Lideri i opozitës në Venezuelë, Juan Guaido, pohoi se po planifikon të kthehet në vend pavarësisht kërcënimeve kundër tij dhe familjes. Ai e deklaroi vendimin e tij në një dalje për mediat pas takimit me presidentin e Brazilit, Jair Bolsonaro, dhe ndër të tjera theksoi sërish se nuk ka asnjë mundësi dialogu me qeverinë e Nicolas Maduro.
Ndërkohë Këshilli i Sigurimit i Kombeve të Bashkuara do të votojë dy rezoluta të kundërta për Venezuelën. Njëra është e sponsorizuar nga Shtetet e Bashkuara dhe mbështet liderin e opozitës Juan Guaido dhe tjera nga Rusia që mbështet presidentin e kontestuar, Nicolas Maduro.
Rezolutat rivale reflektojnë ndarjet e thella në Këshillin e Sigurimit lidhur me konfliktin politik në Venezuelë, vend ky që po përballet me kolapsin ekonomik dhe një krizë humanitare.
Kujtojmë se Uashingtoni dhe Moska janë duke përkrahur palë të ndryshme në shtetin e Amerikës Jugore. Shtetet e Bashkuara përkrahin liderin opozitar, Juan Guaido, i cili ka shpallur veten president të përkohshëm ndërsa Rusia është e lidhur me Maduron.
Maduro drejton vendin prej vitit 2013, dhe fitoi një tjetër mandat presidencial në maj të vitit 2018. Zgjedhjet u bojkotuan nga opozita dhe u kritikuan ashpër nga faktori ndërkombëtar.
Maduro është përballur gjithashtu me akuza për abuzime me të drejta të njeriut si dhe për keqmenaxhim të ekonomisë së Venezuelës./E.M
