Nga Dritan Laci
Kryeministri Rama tregoi edhe njëherë dje në qendrën e botës demokratike se është shumë larg të qenit shtetar i një vendi demokratik ku respektohen të drejtat dhe liritë themelore të individit . I pranishëm në samitin e Kombeve të Bashkuara, në një post-intervistë për Zërin e Amerikës, Rama shprehu edhe njëherë pa iu dridhur qerpiku të gjithë arrogancën e tij prej snobisti ndaj qytetarëve të vendit të tij, lidhur kjo me problemin më të fundit të lindur në lagjen Shkozë, ku 700 banorë dalin si të pastrehë nga projekti për ndërtimin e Unazës Verilindore të Tiranës. Rama i sotëm në pushtet duket shumë larg lotëve të Ramës së djeshëm në opozitë, që përplaste deputetët e tij me policinë Bashkiake të Bashës gjatë kohës që ky i fundit si kryetar i Bashkisë kishte të njëjtën sjellje ndaj bamorëve të gjurmës së Unazës. Krekosja e Ramës dhe ligjërimi arrogant përpara kamerës së “Zërit të Amerikës”, nuk të ngjall asgjë tjetër vetëm se krupë për një kryeshtetar që ka humbur çdo ndjesi humane. Dikush do thotë që shteti nuk bëhet me emocione. Po është e vërtetë deri diku, por shteti është vazhdimësi dhe përgjegjësi. Një shtet demokratik bisedon dhe nuk dhunon. Një shtet demokratik gjen zgjidhje dhe nuk përdor kërbaçin si alternativë të parë, ndryshe një pjesë e mirë e Evropës nëse do të përdornin gjuhën e Ramës ndaj qytetarëve të tyre, nuk do të kishin standardet që kanë sot.
Rama tha dje nga New Yorku se banorët e Shkozës; që rezulton të jenë edhe ata qytetarët e vendit që ai drejton; nuk meritojnë asgjë pasi janë të paligjshëm.
Z.Rama, po kur ndërtove shtëpinë tënde në Surrel, a u pajise me leje ndërtimi. Sepse në dijeninë tonë Komunat dhe Bashkitë kanë vite që nuk japin leje ndërtimi. Këta njerëz që ti u thua jeni të paligjshëm kanë 27 vite që kërkojnë të jenë të ligjshëm, atëherë si është e mundur që ti ndërtove një shtëpi dhe u bëre i ligjshëm.
Nëse pretendon të jesh një shtetar i mirë na e trego si e ke marrë lejen e ndertimit dhe si u bëre i ligjshëm kur bashkia që ti ke drejtuar për afro 11 vite dhe ajo që erdhi më pas nuk jepte leje ndërtimi për banesa private.
Na trego Z. Rama që edhe ne të besojmë që gjuha jote e djeshme në mikrofonin e “Zërit të Amerikës” nuk është ajo e një patrici kundër një plebenjve.
Z.Rama si do të veproje nëse një ditë do të vinin në shtëpinë tënde fadromat e IKMT-së dhe do të prishnin banesën ku jeton pa të dorëzuar një shkresë për shembje.
Z. Rama ti nuk mund të flasësh para mikrofonit të “Zërit të Amerikës” si kryeministri i Xhibutit apo i Somalisë.
Ti je kryeministri i një shteti evropian që është i lidhur me konventa të rëndësishme për të drejtat e njeriut dhe të pronës.
Me gjuhën tënde të djeshme banorët e Shkozës gati i etiketove barbarë që kishin mësyrë tokat e vendit tënd nga kush e di se ku.
Nuk the asnjë fjalë për policinë që shtetërrethoi zonën duke kapur majat e ndërtesave me armë zjarri duke terrorizuar edhe fëmijët.
Nuk ke thënë asnjë fjalë deri tani për IKMT-në që po i prish ndërtesat pa u çuar fillimisht një urdhër shembje banorëve.
Nuk ke thënë asnjë fjalë për dëmshpërblimet që një pjesë e mirë e këtyre familjeve i meritojnë sepse i kanë banesat me letra.
Ky është shteti yt z. Rama?
Ti ke hallin se do të ngelet një çerdhe dhe një shkollë pa ndërtuar me paratë që do u japësh këtyre banorëve të strehohen, që në fund të fundit kanë 27 vite që kontribuojnë me taksat e tyre për këtë shtet, dhe nuk ta ndjen për fëmijët e këtyre kryefamiljarëve që do ta kalojnë tani e tutje dimrin pa strehë mbi kokë.
Që këta fëmijë nuk do të kenë mundës të mirëarsimohen, pasi prindërit e tyre tani e tutje duhet ta nisin jetën nga zero, sikundër edhe vetë ti u the dje nga mikrofoni i “Zërit të Amerikës”.
Ky është shteti yt social z. Rama?
Po të kishte ndodhur me shtëpinë tënde në Surrel një kujë e tillë me siguri do vije ulërimën duke thënë që po të godasin politikisht. Po këta njerëz që tani me afrimin e dimrit dalin me fëmijë e të sëmurë pa çati mbi kokë, kush i mbron.
Çfarë shtetari je ti z. Rama kur flet si i painformuar?!
Aty në atë zonë nuk janë të gjithë pa leje. Ajo është zonë brenda vijës së verdhë të Tiranës. Ndryshe regjimi i kaluar nuk do jepte aty leje ndërtimi për banesa. Në këtë zonë ka 80 banesa që janë ndërtuar në vitet ’80 kur babai yt ishte deputet i Kuvendit Popullor të Republikës Socialiste të Shqipërisë. Nëse njeh punën dhe meritat e babait tënd si shtetar, kafshoje gjuhën dhe mos thuaj që këta banorë janë të paligjshëm.
A e di ti z. Rama, e në mos ditësh, që në këtë zonë në mesin e viteve ’80 ra një fatkeqësi e madhe; u dogj një lagjie e tërë, por pushteti i asaj kohe me gjithë fundin e greminës që po jua afronte, ndryshe nga i yti, brenda pak vitesh strehoi dhe ndërtoi banesa për të gjitha familjet e prekura nga zjarri.
Po shteti yt çfarë bën?!!!
Të kesh nostalgji në kohën ku jetojmë për regjimin e Enver Hoxhës, siç ju po ua sillni në majë të hundës njerëzve me arrogancën tuaj, është turp, në mos të them e qëllimshme.
Z. Rama, e paligjshme në kohën ku jetojmë është gjuha që ti përdor, që nuk ka leje që mund ta legalizojë jo në Evropën e moderuar, po ndoshta edhe në ca vende të humbura të Afrikës, ku nuk do kishte shtetar që të mirrte guximin ta përdorte ashtu si e ti e keqpërdor. Thirri mendjes z. Rama. Lëre arrogancën mënjanë me qytetarët e tu por shko e bisedo se si edhe ata të ndihen qytetarë me te drejta të barabarta në shtetin që ti qeveris prej 4 vitesh dhe jo si barbarë që duhen marrë me dru. / Opinion.al
