Në vend që kreu i Partisë Demokratike, Lulzim Basha, të organizonte protesta qytetare kundër qeverisë, sidomos pas publikimit të çështjes “Tahiri”, ai po mundohet të pastrojë sa më shumë partinë nga armiku i brendshëm.
Ish-deputeti i PD-së, Astrit Patozi, përmes një shënimi në Facebook, ka shkruar se të gjithë mendonin se Lulzim Basha po i mbledh njerëzit këto ditë për t’i organizuar kundër qeverisë, sidomos që çështja “Tahiri” i ka rënë opozitës si dhuratë nga qielli.
Sipas tij, në mos e rrëzoftë dot, të paktën t’ia bëjë jetën e vështirë Edi Ramës. Megjithatë, Patozi thekson se edhe pse qeveria është me brekë nëpër këmbë dhe po përpëlitet, këta e paskan hallin në vend tjetër.
“Ndiqni raportimet e shtypit për mbledhjen e fundit të grupit parlamentar të Partisë Demokratike. Shqetësimi nuk qenka, as droga, dhe as lidhjet e politikës me krimin, por si ta pastrojmë edhe më shumë partinë nga armiku i brendshëm. Pushka top ju bëftë, o trima!”,-shkruan ai.
Ai tregon, se ditën e sotme, takoi një deputet të listës “Basha” dhe i tha me shaka se qeverinë edhe mund ta rrezoni, kurse ne “armiqve” nuk na bëni dot gjë më, pasi nuk keni nga çfarë të na shkarkoni.
“Vetëm burgu dhe vdekja kanë ngelur, por ato, për fat, nuk i ka në dorë Lulzim Basha”,-thekson Patozi.
