Sipas Komisionit Qëndor të Zgjedhjeve pjesëmarrja në zgjedhjet vendore të 30 qershorit ka qenë 22.97%, pra më e lartë nga shifra 21.6% që u raportua mbrëmjen e së dielës.
Nga të dhënat e paraqitura në një konferencë për shtyp, zëdhënësja e KQZ saktësoi se në votime kanë marrë pjesë 812.249 votues, shifër kjo më e lartë se raportimi paraardhës me rreth 40 mijë vota më shumë.
Numri i përgjithshëm i votave të vlefshme për Kryetar bashkie sipas KQZ është 765.825 ndërsa për këshill bashkiak, 760.933 vota.
Një nga çështjet me interes gjatë këtyre votimeve ishte numri i votave të pavlefshme që do të kishte procesi në mungesë të kandidatit alternativ. Edhe në rastet e bashkive ku kishte dy ose më shumë kandidatë është vënë re se numri i votave të pavlefshme ka qenë më i lartë se numri i votave për kandidatin kundërshtar të Partisë Socialiste. Një shembull për këtë është Bashkia Tiranë ku kandidati i Bindjes Demokratike Arben Skënderi mori rreth 9400 vota, ndërsa votat e pavlefshme ishin rreth 11 mijë.
Sipas të dhënave të fundit të KQZ numri i përgjithshëm i votave të pavlefshme për kryetar bashkie është 45.276, ndërsa për këshillat bashkiak është 49.986. Këto shifra tregojnë se në krahasim me zgjedhjet vendore të 2015 kemi një dyfishim në përqindje të votave të pavlefshme. Konkretisht në 2015 për kryetar bashkie votat e pavlefshme ishin 2.39%, rreth gjysma e 5.63% që kanë qenë në këto zgjedhje. E njëjta gjë vlen dhe për votat për këshill, 3.08% vota të pavlefshme në 2015 krahasuar me 6.15% në këto zgjedhje.
Megjithatë KQZ shtoi se këto shifra mund të ndryshojnë përsëri pas rezultatet përfundimtare shpallen pas përfundimit të periudhës së animimit nga ana e subjekteve zgjedhore.
“Sipas ligjit, për 51 bashkitë e administruara nga një KZAZ, afati 5 ditor i ankimimit fillon nga data e miratimit të vendimit për nxjerrjen e rezultatit nga KZAZ. Theksojmë se rezultati përfundimtar zyrtar do të shpallet vetëm pas përfundimit të afateve ankimore në rrugë administrative pranë KQZ apo ankimimeve të mundshme në Kolegjin Zgjedhor” tha zëdhënësja e KQZ Drilona Hoxha. /Opinion.al
