Këshilli Politik do të mblidhet ditën e nesërme. Praninë në tryezën ku do të diskutohen ndryshimet në Kodin Zgjedhor e ka konfirmuar edhe opozita.
Në një letër drejtuar përfaqësuesit të Partisë Socialiste në Këshillin Politik, Damian Gjiknuri, opozita konfirmon pjesëmarrjen por kërkon që mbledhja të zhvillohet në orën 12:00 dhe jo në 10:30 siç ishte njoftuar më parë.
Ndër të tjera në letër opozita shkruan se refuzimi i kërkesës së saj që mbledhja të mbahej në ditën e mërkurë është veprim i gabuar por që nuk do përsëritet më.
Nga ana e tij Gjiknuri i ka kthyer përgjigje pozitive se konfirmon pjesëmarrjen e tij në orën 12:00 për ditën e premte, 17 shtator.
Nesër pritet që mazhoranca të paraqesë propozimet konkrete për pragun elektoral, hapjen e listave dhe formulën e koalicioneve. Opozita nga ana tjetër ka këmbëngulur që Këshilli Politik t’i drejtohet zyrtarisht ODIHR-it, që të japë një opinion për koalicionet, që ajo kërkon të mos ndryshohen./ Opinion.al
