Lajmi se trupi i gjetur në rrënojat e aeroplanit të rrëzuar në Kanalin Anglez i përket lojtarit të Cardiff City, Emiliano Sala, duket se i ka dhënë fund shpresës për familjen e futbollistit.
Motra e tij Romina mes lotësh shprehu pikëllimin për humbjen e të vëllait, ndërsa në postimin e saj në rrjetet sociale shkruan:
“Shpirti yt në shpirtin tim do të shkëlqejë përgjithmonë, duke më ndriçuar për aq sa të ekzistoj. Të dua, Tito”.
28-vjeçari Emiliano Sala udhëtonte për në Cardiff në një avion ku ndodhej vetëm me pilotin. Avioni u zhduk nga radarët në zonën e Kanalit anglez më 21 janar. Operacionet e para të kërkimit dështuan kështu që familja, fansat dhe miqtë e lojtarit sponsorizuan kërkime private. Me anë të paisjeve të veçanta u gjetën fillimisht rrënojat e avionit, e më vonë dhe një trup që i përket lojtarit Sala. Ky lajm u bë i ditur nga policia e Dorsetit.
Në deklaratën e policisë të enjten mbrëma shkruhet:
“Trupi i sjellë në Portland Port, të enjten me 7 shkurt 2019, është identifikuar zyrtarisht dhe është i futbollistit profesionist Emiliano Sala.Familja e z.Sala dhe e pilotit David Ibbotson janë njoftuar me këtë lajm dhe do të vazhdojnë të mbështeten nga oficerët e trajnuar posaçërisht për familjet në këto raste. Mendimet tona mbeten me ta në këtë kohë të vështirë. Operacioni i kërkim shpëtimit ishte i pasuksesshëm në gjetjen e avionit dhe dy personat. Pas kësaj, ekipet kërkimore të AAIB të financuara privatisht u vendosën në zonën përkatëse”, thuhet në njoftim./E.M
