Vetëm pak orë pasi Gjykata vendosi lirimin e tij, ish-deputeti i Partisë Demokratike, Klevis Balliu i është bashkuar përsëri protestës së banorëve të Unazës së Re.
Gjykata e Tiranës vendosi për Balliun masën “detyrim paraqitje”, për akuzat “Kundërshtim me dhunë të punonjësve të policisë”, “prishje e qetësisë publike” dhe “pengim i qarkullimit të mjeteve të transportit”.
Ish-deputeti u shoqërua së bashku me disa qytetarë të tjerë tëUnazës së Re, të cilët protestuan gjatë kohës që kryeministri Edi Rama do të vizitonte një biznes në atë zonë.
Protestuesit dhe Balliu u përplasën me punonjësit e policisë, dhe më pas u shoqëruan në komisariat.
Ndërkohë, ditën e sotme demokrati është shprehur se shoqërimet me urdhër të Ramës e bëjnë atë më të fortë. Ndërsa theksoi se Partia Demokratike do të mbrojë banesat e qytetarëve që preken nga projekti i Unzës së Re.
“Për ju jo dy ditë por edhe 2 mijë ditë janë pak burg për kauzën tuaj. Edi Rama bashkë me pinjollët e tij të Rilindjes, si Revani Jaupi që së shpejti do të bëhet hallvë. Edi Ram dhe pinjollët e tij janë në ditët e fundit dhe kjo është arsyeja se pse tani janë më të dhunshëm me qytetarët e këtij vendi. Jam këtu për ta garantuar se nuk ka burg që na ndal. Nuk frikësohemi me shoqërime, vetëm Zoti mund të na ndalojë. Edi Rama do të na bëjë më të fortë. Edvin, siç e pe edhe vet ti dhe qeveria jote e mbaruar nuk mban dot një takim, jo të hysh tek Unaza e Re”, tha Balliu/ Opinion.al E.Xh.
