Mesfushori kosovar Herolind Shala ka ndryshuar skuadër. Ai do ta vazhdojë karrierën e tij në Turqi te skuadra e Superligës turke, Kasëmpasha. Klubi turk ka bërë ditën e sotme prezantimin e futbollistit, të cilin e kanë marrë në huazim njëvjeçar me të drejtë blerjeje përfundimtare nga skuadra çeke e Sparta Pragës.
Shala vitin e shkuar ishte i huazuar te skuadra e Sllovan Liberec në kampionatin çek dhe në fund të sezonit u kthye te klubi që zotëron kartonin e tij. Hapësirat e Shalës te Sparta do të ishin tepër të vogla duke qenë se trajneri i skuadrës nuk e kishte në planet e tij, ndaj dhe mesfushori zgjodhi të largohej drejt Kasëmpashës në kampionatin turk. Përveç klubit, Shala ndryshoi edhe skuadrën përfaqësuese, pasi braktisi kombëtaren shqiptare për të veshur fanellën e Kosovës.
“Klubi i ri dhe kampionat i ri. Dua të ju njoftoj miqtë e mij që nga sot jom edhe zyrtarisht pjesë e skuadrës turke Kasimpasa. Mezi pres të filloj të luaj me skuadrën e re dhe të kemi suksese në kampionatin turk”, shkruan Shala në faqen e tij zyrtare në Facebook.
