Kjo e shtunë si pasojë e kalimit të një fronti të ngrohtë atmosferik nga jugperëndimi i Europës drejt Ballkanit do të sjellë në territorin shqiptar mbizotërim të vranësirave të cilat pas orëve të mesditës do të gjenerojnë reshje shiu si fillim në zonat veriore dhe gradualisht do të përfshijnë zonat veriperëndimore si edhe disa zona në qendër të territorit ku në zonat veriperëndimore do të jenë në formë rrebeshi.
Parashikohet që orët e vona të mbrëmjes të sjellin reshje në të gjithë territorin e vendit.
Sipas MeteoAlb, temperaturat e ajrit do të rriten sërish si në mëngjes edhe në mesditë duke luhatur vlerat ditore 3°C deri në 24°C.
Era do të fryjë e fortë si në tokë dhe në det duke arritur shpejtësinë maksimale mbi 70 km/h nga drejtimi kryesisht jugor, kjo do të bëjë që në brigjet detare të gjenerohet dallgëzim deri në 6 ballë.
