Agjencia Kombëtare e Krimit NCA në Britani ka arrestuar një shqiptare, e cila akuzohet se kishte krijuar një ‘perandori’, që u siguronte pasaporta britanike kriminelëve.
Edhe pse mosha dhe identiteti i shqiptares nuk bëhet publike, ajo akuzohet për mashtrim dhe pengim të drejtësisë, ndaj u prangos ditën e djeshme. Por pavarsisht akuzave, gjykata vendosi ta hetojë në gjendje të lirë.
Sipas policisë vendase arrestimi erdhi pas një operacioni të drejtuar nga NCA dhe ku morën pjesë disa agjenci. Operacioni kishte si qëllim goditjen e një rrjeti që dyshohej se ndihmonte në lehtësimin e marrjes së nënshtetësisë dhe pasaportave britanike, mashtrim e pastrim parash. Autoritetet besojnë se ky rrjet u ka siguruar kriminelëve një mënyrë për të marrë pasaporta britanike.
Mediat britanike, shkruajnë se shqiptarja kishte ngritur një biznes duke përdorur identitet fals dhe kishte nënshkruar aplikimet për rreth 500 pasaporta britanike. Këtu bënin pjesë grupet e organizuara kriminale shqiptare, duke përfshirë trafikantë droge, trafikantë të qenieve njerëzore, persona të akuzuar për abuzim me fëmijët, pengmarrje dhe dhunë./Opinion.al
