Turqia është përballur me përmbytje si pasojë e reshjeve të shiut, pas zjarreve që për më shumë se dy javë shkrumbuan sipërfaqe të mëdha pyjesh, banesa dhe shkaktuan viktima.
Autoritetet në këtë shtet bëjnë me dije se 13 persona janë plagosur pasi një urë është shembur në Bartin dhe 12 fshatra kanë mbetur pa energji elektrike.
Në provincën e Sinopit, 240 kilometra në lindje të Bartin, një shtëpi u shemb për shkak të përmbytjes. Ndërkohë pacientët e një spitali janë evakuuar dhe disa rrugë në Sinop janë bllokuar, pasi meteorologët kanë parashikuar shira të dendur në zonë.
Pjesa veriore e Turqisë është më e rrezikuara nga përmbytjet gjatë verës si pasojë e reshjeve të mëdha. Vitin e kaluar, të paktën pesë persona humbën jetën për shkak të përmbytjeve.
