Ambasadori i Bashkimit Europian në Shqipëri, Luigi Soreca ka reaguar në Twitter duke i bërë thirrje qeverisë dhe opozitës që ka ardhur koha të tregojnë maturi duke ju drejtuar një dialogu për të zgjidhur situatën aktuale.
Ai thekson se implementimi i reformës në drejtësi është një proces i pakthyeshëm dhe se pas krijimit të SPAK dhe Gjykatës Kushtetuese do të intensifikohet lufta kundër korrupsionit dhe krimit të organizuar përfshi edhe krimet elektorale. Soreca i bën thirrje edhe prokurorisë të hetojë rastet e korrupsionit duke përmendur dhe blerjen e votave.
Ky reagim i ambasadorit të BE vjen një ditë pas deklaratave të presidentit Ilir Meta i cili kritikoi mbarëvajtjen e reformës në drejtësi duke e quajtur atë “Ramaformë”
“Është koha që qeveria shqiptare, opozita dhe institucionet të tregojnë pjekuri dhe të angazhohen urgjentisht në dialog për të kapërcyer situatën politike aktuale. Është gjithashtu koha të ecet përpara me reformat e sundimit të ligjit. Zbatimi i reformës në drejtësi vazhdon dhe është i pakthyeshëm. Fokusi tani është krijimi i SPAK dhe rikthimi i funksionalitetit të Gjykatës Kushtetuese. Sapo të përfundojë procesi rigoroz i rivlerësimit të kandidatëve, SPAK do t’i mundësojë të rrisë më tej luftën kundër korrupsionit dhe krimit të organizuar, ndërsa Gjykata do të qartësojë të gjitha çështjet e pazgjidhura në lidhje më të drejtat kushtetuese, përfshi çështjet zgjedhore. Lufta kundër korrupsionit duhet të vazhdojë në mënyrë të përditshme. Prokuroria duhet të hetojë çdo formë të dyshuar të korrupsionit, përfshi shkeljet zgjedhore & blerjen e votave,në zbatim të ligjeve në fuqi. Për të konfirmuar që cikli i drejtësisë penale punon efektivisht është gjithashtu e rëndësishme që gjykatat të japin dënime përfundimtare mbi akuza të pazgjidhura për çështje serioze të krimit të organizuar. Gjithashtu,duhet të rinisë me shpejtësi puna ndërpartiake për reformën zgjedhore. Të gjitha institucionet shqiptare &liderët politikë duhet të përqëndrojnë përpjekjet e tyre në këto objektiva,në kuadër të vendimit të rëndësishëm të EUCouncil në tetor. BE do të vazhdojë të mbështesë plotësisht Shqipërinë dhe qytetarët e saj, të cilët besojnë fuqishëm në të ardhmen evropiane të vendit të tyre. BE për Shqipërinë” shkruan Soreca. /Opinion.al
