Makinat e policisë ushtarake janë futur në mbrëmjen e sotme në pjesën ushtarake të aeroportit të Rinasit.
Pas grabitjes së ditës së djeshme në Rinas, ministrja e Mbrojtjes, Olta Xhaçka, urdhëroi që në perimetrin e sigurisë së aeroportit “Nënë Tereza” të vendosen efektivë të Policisë Ushtarake dhe Batalionit Special të Forcave tona të Armatosura.
Xhaçka në deklaratën e saj kritikoi kompaninë kineze që ka edhe koncesionin e Aeroportit “Nënë Tereza”, për sigurinë e aeroportit.
“Ajo që tashmë dihet nga analiza dhe hetimi është se, mekanizmat e sigurisë, që janë nën përgjegjësinë e kompanisë kineze koncensionare të aeroportit, kanë dështuar tërësisht”, tha Xhaçka. “Koncesionari ka dështuar të përmbushë përgjegjësitë e tij për garantimin e parametrave të sigurisë fizike dhe nuk ka zbatuar standardet e detyrueshme të sigurisë, që përcaktohen nga legjislacioni vendas dhe nga Organizata Botërore e Aviacionit Civil. Kjo është një shkelje e papërgjegjshme dhe shumë e rëndë e legjislacionit shqiptar, për të cilën, shpresoj dhe besoj që përgjegjësitë penale të jenë konkrete”./ Opinion.al E.Xh.
