Situata e tensionuar në Shkodër, si pjesë e luftës mes dy grupeve kriminale, ka detyruar Ministrin e Brendshëm Sandër Lleshaj të vizitojë qytetin. Më herët në Shkodër mbërriti edhe Drejtori i Përgjithshëm i Policisë së Shtetit, Ardi Veliu.
Mëngjesin e kësaj të shtune, qyteti verior u trondit nga një atentat mafioz ku u ekzekutuan dy vëllezërit Astrit e Brahim Bilali. Ngjarja ndodhi në lagjen Kiras, e cila është një nga zonat më problematike të Shkodrës.
Dy vëllezërit u qëlluan me breshëri automatiku nga një automjet, duke mos i lënë mundësi viktimave të reagonin. Ata kanë mbetur të vdekur në vend, si pasojë e plumbave të marrë.
Autorët më pas u larguan me shpejtësi nga vendi i krimit, ndërsa mjeti që u përdor në atentat u gjet i djegur në rrugicat e lagjes. Ekspertët e kanë këqyrur me shpresë që të gjejnë prova, pasi makina ishte djegur pjesërisht.
Pista kryesore hetimore që ka grupi hetimor është ajo e larjes së hesapeve mes grupeve rivale dhe pikërisht këtu është fokusuar puna e hetuesve.
Astrit Bilali është babai i Asmer Bilalit, ish-kampionit të boksit i arrestuar nga policia si pjesë e grupit Bajri. Ai ka qenë pronar i një resorti hipizmi në Shkodër. Ndërsa Brahim Bilali ka qenë kryetar i Shoqatës 2 Prilli 1992./Opinion.al
