Kryeministri Rama përmes një postimi në rrjetin social Facebook ka tregon se po vijon puna për ndërtimin e 15 pallatave në Fushë Krujë.
Në video Rama paraqet edhe projektin e 15 pallateve 5 katëshe si dhe të shtëpive, në të cilat priten të strehohen më shumë se 1 mijë banorë, banesat e të cilëve u dëmtuan nga tërmeti i 26 Nëntorit .
“Dhe me kantierin e Rindërtimit në Fushë-Krujë, ku janë hedhur themelet e është shtruar e gjithë infrastruktura nëntokësore e lagjes së re, për familjet që humbën shtëpitë në tragjedinë e 26 nëntorit, ju uroj një ditë të mbarë”, shkruan Rama.
Kujtojmë se një pjesë e familjeve të prekura nga tërmeti i vitit të shkuar vijojnë të jetojnë në çadra.
Vetëm një ditë më parë, kreu i opozitës Basha, gjatë një vizite në Durrës, vuri në dukje një sërë problematikash të lidhura me strehimin apo kompensimin e qerave për banorët e prekur nga tërmeti.
“Dhjetra familje në Manzë dhe në zonat e tjera të goditura nga tërmeti, jetojnë ende në çadra dhe në kushte shumë të vështira. Këta banorë kanë rreth 10 muaj pa një çati mbi kokë për veten dhe fëmijët e tyre.
Qeveria i gënjeu kur ju premtoi se do t’i strehonte dhe sistemonte familjet, banesat e të cilëve u shkatërruan nga tërmeti. Sot në Manzë takova të moshuar të pastrehë, prindër pa shtëpi, që jetojnë në çadër, të braktisur nga qeveria. Asnjë qindarkë nga paratë publike të shtetit apo nga fondet e dhëna nga BE nuk ka ardhur këtu”, shkruante dje Basha ne postimin e tij. /Opinion.al
