Ministria e Arsimit, Rinisë dhe Sporteve, Besa Shahini pas takimit me një grup pedagogësh doli në një deklaratë për mediat. Shahini tha se zgjidhja e problemeve duhet të gjendet në universitete dhe shtoi se ka takuar pedagogë e studentë që e mbështesin “Paktin për Universitetin”.
Shahini pohoi se pedagogët i kishin dërguar një letër, e më pas ajo i priti në një takim, ku i ftoi të diskutojnë Paktin për Universitetin. Sipas saj dhe pse palët nuk ranë dakord, kjo është krejt normale.
“Këto ditë kemi takuar grupe pedagogësh dhe studentësh që kanë shprehur mbështetjen për Paktin për Univeristetin. Një grup pedagogësh më kanë dërguar një letër. Në momentin e dërgimit të letrës i mora në telefon dhe i prita në një takim. Në nivel fakulteti me thanë se nuk janë mbledhur asnjëherë 3 vitet e fundit. Adresa e zgjidhjes nuk është këtu, por te universiteti.
I ftova për t’i shpjegur paktin për universitetin, dhe se kemi qëllim të përbashkët, përmirësimin e cilësisë së Arsimit të Lartë. Nuk u dakordësuam, por është krejt normale. Takimi shërbeu për të shuar edhe keqkuptime që disa pedagogë kishin për paktin, ne do të vazhdojmë ti dëgjojmë të gjithë por do të vijojmë duke udhëhequr. Për të arritur në fund tek një kontratë mes qeverisë dhe studentëve”- tha ajo.
